BESIMI, DRITË QË NDRIÇON SHPIRTIN !
Nga: Çenkuela Selenica
Besimi është frymëmarrja e shpirtit. Ai nuk është thjesht një mendim apo një bindje njerëzore, por një dhuratë e Perëndisë që i jepet njeriut që kërkon me zemër të pastër. Shenjtori i madh, Shën Joan Gojarti, thotë:
“ Besimi është themeli i çdo gjëje; nga ai lind shpresa dhe dashuria.”
Ai nuk është një ide abstrakte, por një lidhje e gjallë me Krishtin, një thirrje e brendshme që zgjon shpirtin për të njohur Atë, që është Vetë e Vërteta!
Apostull Pavli na mëson:
“ Pa besim është e pamundur t’i pëlqesh Perëndisë”(Heb. 11:6).
Besimi është si një urë që na çon nga toka drejt qiellit, nga errësira drejt dritës. Ai nuk shikohet me sytë e mishit, por ndjehet në zemrën që e di se Zoti është pranë, edhe kur gjithçka duket e errët.
Shën Nikolla Kavasila e quan besimin “ Dritë që na udhëheq në natën e kësaj bote”.
Ai thotë se shpirti që beson nuk ndalet tek dukja, por sheh përtej asaj që është e prekshme: Sheh dorën e Perëndisë që drejton gjithçka.
Shën Maksim Rrëfimtari na kujton se besimi i vërtetë nuk është thjesht pranimi i disa të vërtetave, por një përfshirje e të gjithë qenies sonë:
“ Ai që beson me zemër, e ngre mendjen drejt Zotit, dhe kjo besëlidhje e bën shpirtin banesë të hirit.”
Besimi gjithmonë shoqërohet me provë.
Shën Andoni i Madh thotë:
“ Pa tundime, askush nuk mund të shpëtojë. Sepse besimi provohet si ari në zjarr. Dhe në këtë provë,shpirti mëson të mbështetet jo tek vetja, por tek Zoti.”
Në traditën e Kishës sonë, Shën Maria Egjiptianena mëson se besimi është më i fortë se mëkati. Ajo që kishte jetuar në errësirë, me një pendesë të thellë dhe besim të palëkundur, u bë një dritë për të gjithë botën!
Po kështu, Shën Nektari i Egjinës thotë:
“ Besoni fortë dhe mos u trembni nga stuhitë. Krishti është me ju, edhe kur ju mendoni se Ai po fle.”
Besimi nuk është vetëm fjalë, por jetë. Ai ushqehet me lutje, me pjesëmarrje në Misteret e Shenjta, me leximin e Shkrimit të Shenjtë dhe Jetët e Shenjtorëve.
Shën Siluani i Athonit thotë:
“ Mbaje mendjen në ferr dhe mos u dëshpëro, sepse Zoti është pranë teje.”
Kjo është një thirrje për besim të plotë: Edhe kur duket se gjithçka është humbur, dashuria e Krishtit nuk na lë kurrë!
Në fund, Shën Joani i Kronstadit shkruan:
“ Besimi është shkëndija e parajsës në zemër; mos e shuaj me dyshim, por ushqeje me lutje dhe punë të mira.”
Besimi është si një fener në mes të stuhisë: Nuk largon erërat, por tregon rrugën drejt bregut. Ai është premtimi se Krishti është gjithmonë pranë nesh dhe shenjtorët janë dëshmia e gjallë e kësaj Dashurie Hyjnore!