DUHET APO JO T’A PËRDORIM FJALËN KURVËRI ?

May 28, 2025 at 1:39 pm, No comments

Nga Katekisti: Miron Çako

Kur sot përdoret ose dëgjohet privatisht apo publikisht fjala kurvëri, disa njerëzve iu bën shumë përshtypje negative , duket si fjalë shumë e rëndë , fyese, e patolerueshme, turp të thuhet ,apo si një skandal për publikun . Madje edhe kur dikush e thotë mediatikisht,e çensurojnë dhe është një tendencë që fjalën kurvëri në diskutim, apo edhe në predikim, t’a zëvëndësojnë me fjalën imoralitet ose prostitucion.

Fjala kurvëri në çdo gjuhë,edhe në shqip, ka kuptimin e saj specifik.

Konkretisht në çdo gjuhë kurvëria përcaktohet si:

“Marrëdhënie thjesht seksuale jashtë martese, pa marrë parasysh ndjenjat ose angazhimet, detyrimet martesore, por vetëm për kënaqësinë e instiktit seksual episodik apo të vazhduar, me një partner ose me shumë të tillë .”

Jo vetëm në zhargonin e përditshëm të gjuhës popullore, por dhe në Shkrimin e Shenjtë që është fjala e Zotit të Tërëshenjtë drejtuar njerëzimit në çdo kohë, fjala kurvëri është përdorur shumë herë si diskretitim dhe qortim ndaj këtij mëkati me një konotacion të dyfishtë, si kurvëri mishore dhe frymore.

Në Shkrimin e Shenjtë, fjala kurvëri përcaktohet si kontakt seksual jashtë fejesës dhe martesës fetare.

Sqarojmë se edhe pse në Dekalogun, në porosinë e shtatë urdhërohet: “ Mos shkel besnikërinë bashkëshortore ” ( Eksodi 20-14), asnjëherë nuk do të thotë se ishte e toleruar kurvëria mes të pamartuarve, si ishte e ndaluar kurorëshkelja mes të martuarve , por që të dyja kurvëria dhe kurorëshkelja ishin të dënuara kategorikisht sipas Ligjit Mosaik .

Sipas Ligjit Mosaik, ai ose ajo që kapej në kurvëri, kurorëshkelje, dënohej me lapidim, pra me vrasje me gurë, ashtu si urdhëron Ligji:

“ Por në qoftë se vërtetohet fakti dhe tek e reja nuk janë gjetur shenjat e virgjërisë, atëherë do t’a nxjerrin të renë te pragu i shtëpisë së babait të saj dhe njerëzit e qytetit të saj do t’a vrasin me gurë, dhe ajo ka për të vdekur, sepse ka kryer një vepër të turpshme në Izrael, duke u bërë kurvë në shtëpinë e atit të saj. Kështu do të shkulësh të keqen nga gjiri juaj” ( Ligji i Përtërirë 22: 2-21).

“ Në rast se një burrë gjendet në shtrat me një grua të martuar, do të vriten që të dy, si burri që ka rënë me gruan dhe gruaja. Kështu do të shkulësh të keqen nga gjiri i Izraelit. Kur një vajzë e virgjër është e fejuar, dhe një burrë e gjen në qytet dhe bie në shtrat me të,që të dy do t'i çoni në portën e atij qyteti dhe do t'i vritni me gurë, dhe ata do të vdesin: vajza sepse, ndonëse ishte në qytet, nuk bërtiti, dhe burri sepse ka çnderuar gruan e të afërmit të tij. Kështu do t’a shkulësh të keqen nga gjiri yt.” ( Ligji I Përtërirë 22: 22-24).

Kurse dënohej me gjobë dhe me marrjen për grua, burri që kurvëronte dhe i mori virgjërinë një vajze të pafejuar :

“ Në rast se një burrë gjen një vajzë të virgjër që nuk është e fejuar (martuar) , e merr dhe bie në shtrat me të, dhe kapen në flagrancë, burri që është shtrirë me të, do t'i japë atit të vajzës pesëdhjetë sikla argjendi dhe ajo do të bëhet bashkëshortja e tij, sepse e ka çnderuar dhe nuk mund t’a përzërë sa të jetë gjallë.” ( Ligji i Përtërirë 22 : 28-29).

Dikujt që sot jeton në një shoqëri liberale seksualisht ku edhe bashkejetesa pa martesë, kurorë, disi është ligjëruar , këto ligje kundër kurvërisë dhe kurorëshkeljes, i duken absurde, shumë të ashpra, denigruese dhe çnjerëzore , por ne nuk harrojmë se të gjitha këto ligje ishin porosi të Zotit Perëndi tek populli i Izraelit, i vetmi popull monoteist që duhet të bekonte dhe nderonte martesën sipas Zotit , ashtu ishte bërë me çiftine parë në botë Adamin edhe Evën , që mbasi i krijojë i bekoji dhe ju tha :"Të jeni të frutshëm dhe shumëzohuni "( Zanafilla 1-28).

Prandaj nuk lejohej bashkëjetesë pa martesën e bekuar nga Zoti dhe çdo bashkëjetesë pa martesë dhe bekim ishte kurvëri dhe mëkat i dënueshëm.

Kujtojmë se edhe kur popuj të tjerë paganë u bënë monoteist, të krishterë, këto ligje Biblike mbi martesën dhe kundra bashkëjetesës frymëzuan në këto popuj kanune , kode civile pro martesës dhe kundra, bashkëjetesës, kurvërisë dhe kurorëshkeljes.

Një ndër këto kode civile ishte edhe Kanuni i Lekë Dukagjinit të III-të (1459 - 1479), një kod civil për të rregulluar marrëdhëniet shoqërore edhe të shenjtërisë së martesës, sidomos në zonën e Veriut, pa përjashtuar edhe jugun gjer në vitin 1929, kur hyri në fuqi kodi civil i shtetit shqiptar të mbretit Zog dhe në 1945 Republika Popullore që po ashtu nderonte martesën .

Kështu edhe në vendin tonë sipas traditës shekullore , kodeve , ligjeve bashkëjetesa ka e qënë dënuar si kurvëri dhe martesa ka qënë e nderuar dhe e shenjtë.

Kënvështrimi mbi këto parime morale ka ndryshuar tani vonë sipas frymës së re rebele botërore ( NEW AGE) që kërkon të prishë çdoi themel moral të njerëzimit, sidomos martesën tradicionale .

Por le të kthehemi të sqarojmë edhe konceptin biblik, se çfarë është kurvëria shpirtërore!

Kurvëria shpirtërore është një akt shpirtëror dhe formal, ku një besimtar tradhëton Zotin e vërtetë dhe lidhet direkt ose indirekt me zota të rremë , perënditë e huaja, apo idhujt dhe bestytnitë . Kjo situatë cilësohet apostazi dhe cilësohet në Bibël si "kurvëri shpirtërore", ose thyerje "kurore" me Zotin , sepse lidhja e Perëndisë me popullin e Tij, Izraelin, konsiderohej si një lloj martese frymore, ashtu profeti Jeremia qorton Izraelin:

“ Por ashtu si një grua nuk është besnike ndaj burrit të saj, kështu ju keni qenë jobesnikë ndaj meje, o shtëpia e Izraelit",- thotë Zoti. ( Jeremia 3-20).

Po ashtu edhe profeti Osea qorton Izraelin për kurvëri shpirtërore, duke rënë në idhujtari :

“ Populli im konsulton idhujt e tij prej druri dhe shkopi i tij i jep udhëzime, sepse fryma e prostitucionit i devijon, dhe ata kurvërohen, duke u shmangur nga Perëndia i tyre. Ata bëjnë flijime mbi majat e maleve, djegin temjan ndër kodra, nën lisin, plepin dhe bafrën, sepse hija e tyre është e këndshme. Prandaj bijat tuaja kurvërohen dhe nuset e bijve tuaj shkelin kurorën. Nuk do t'i dënoj bijat tuaja nëse kurvërohen, as nuset e bijve tuaj nëse shkelin kurorën, sepse ata vetë veçohen me prostitutat dhe ofrojnë flijime bashkë me prostitutat e tempujve; prandaj njerëzia që nuk ka mend do të vdesë”. ( Osea 4 : 11-14).

Jo vetëm Izraeli por në Bibël edhe Babilonia që simbolizon pushtetet ateiste të kombeve paganë, është cilësuar “kurva e madhe” që qortohen nga Drejtësia Hyjnore dhe dënohen gjatë historisë kozmike, sepse këto qytetërime kurvërojnë si trupërisht edhe shpirtërisht :

“ Eja, do të të tregoj gjyqin e kurvës së madhe që është ulur në ujëra të shumta, më të cilën u kurvëruan mbretërit e dheut, dhe banorët e dheut u dehën me verën e kurvërisë së saj.”

“ Dhe më çoi një Frymë në një shkretëtirë, dhe pashë një grua që rrinte mbi një bishë të kuqe, plot me emra blasfemie dhe që kishte shtatë krerë dhe dhjetë brirë.Edhe gruaja ishte veshur me purpur dhe me të kuq të ndezur, e stolisur me ar, gurë të çmuar dhe me margaritarë; kishte në dorë një kupë ari plotë me neveritë dhe ndyrësitë e kurvërimit të saj.Dhe mbi ballin e saj ishte shkruar një emër: “Misteri, Babilona e Madhe, nëna e lavireve dhe e neverive të dheut.”

“Ra, ra Babilona, qyteti i madh që u ka dhënë të pinë të gjithë kombeve verën e zemërimit të kurvërimit të saj.” ( Zbulesa 17 : 1-5).

Edhe në Dhiatën e Re, ku theksohet mëshira e Perëndisë me anën e hirit të Jisu Krishtit, i cilësuar “miku i mëkatarëve”,(Mateu 11:19 falësi i doganierëve dhe i prostitutave ( Joani 8-11) , përsëri fjala “kurvëri” është e përdorur shumë herë si denoncim dhe qortim për mëkatet trupore jashtë martese.

Konkretisht fjala greke “pornéia”, që ka kuptimin e mungesës së dëlirësisë, një term i përgjithshëm për të gjitha marrëdhëniet seksuale të paligjshme, si kurvëria, kurorëshkelja, gjendet në 25 vendet vijuese të Dhiatës së Re.

P.sh. në Ungjillin sipas Mateut që u përkthye që shekullin e I ps.K në greqisht, si gjuha e kombeve, përmenden fjalë të Krishtit , Birit të Zotit dhe Birit të njeriut kundra kurvërisë (pornéia):

“ Por unë po ju them: Kushdo që e përzë gruan e tij, me përjashtim të rastit të kurvërisë, e bën atë të shkelë kurorën; dhe kushdo që martohet me një grua të ndarë, shkel kurorën.” (Mattheu 5:32) .

Në Ungjill kemi gjithashtu këshillat e Apostujve të Krishtit kundër kurvërisë ndaj të krishterëve që vinin nga kombet :

“ Hiqni dorë nga ndotjet e idhujve, nga kurvëria, nga gjërat e mbytura dhe nga gjaku”. (Veprat e Apostujve 15:20) .

Po ashtu apostulli i kombeve Pavli, që cilësohej edhe si goja e Krishtit, shkruan në letrat e tij pastorale kundra kurvërisë :

“ Perëndia im do të më përulë në mes tuaj dhe unë do të vajtoj për shumë nga ata që kanë mëkatuar më parë dhe nuk u penduan për fëlliqësinë, kurvërinë dhe shthurjen që praktikuan.” ( 2 Korintasve 12: 21; 19 ).

“ Dhe veprat e mishit janë të zbuluar dhe janë: kurorëshkelja, kurvëria, ndyrësia, shthurja, idhujtaria, magjia, armiqësimi, grindjet, xhelozitë, mëritë, zënkat, përçarjet, tarafet, smira, vrasjet, të dehurit, grykësia dhe gjëra të ngjashme me këto, për të cilat po ju paralajmëroj, sikurse ju thashë edhe më parë, se ata që i bëjnë këto gjëra nuk do të trashëgojnë Mbretërinë e Perëndisë”. (Galatasve 5: 19-21).

“ Të dini në fakt këtë: asnjë kurvar, i ndyrë ose kurnac, i cili është idhujtar, nuk ka ndonjë trashëgim në Mbretërinë e Krishtit dhe të Perëndisë ”.(Efesianëve 5:3).

“ Sepse ky është vullneti i Perëndisë: shenjtërimi juaj; të hiqni dorë nga kurvëria; që secili prej jush të di t’a mbaj enën e vet në shenjtëri dhe me nder, jo me pasione epshi, si johebrenjtë, që nuk e njohin Perëndinë.” ( 1 Selanikasve 4:3).

Po ashtu edhe në librin e fundit profetik të Biblës ,Zbulesës, flitet qartë kundra kurvërisë si trupore edhe asaj frymore :

“ Por kam disa gjëra kundër teje, sepse ti e lejon gruan Jezabel, që e quan veten profeteshë, të mësojë dhe t’i mashtrojë shërbëtorët e mi, të kurvërojnë dhe të hanë gjëra të flijuara idhujve. Dhe i dhashë kohë që të pendohet për kurvërinë e saj, por ajo nuk u pendua.Ja, unë e flakë atë në një shtrat vuajtjesh, dhe ata që kurvërojnë me të, në shtrëngim të madh, po nuk u penduan për veprat e tyre.” (Zbulesa 2:21 ) .

“ Dhe ata nuk u penduan për vrasjet e tyre, as për magjitë e tyre, as për kurvërimin e tyre dhe as për vjedhjet e tyre.” ( Zbulesa 9: 21).

Folja “pornéio”, që në BR-në është përkthyer «praktikoj kurvërinë», «kryej kurvëri» ose «kurvërohem», shfaqet në 8 vendet vijuese në Dhiatën e Re, p.sh. :

“ A nuk e dini ju se të padrejtët nuk do të trashëgojnë Mbretërinë e Perëndisë? Largohuni nga kurvëria! Çdo mëkat që kryen njeriu është jashtë trupit, por ai që kurvëron mëkaton kundër trupit të vet.” ( 1 Kolosianëve 6: 18).

Po ashtu tek Libri i Zbulesës:

“ Por kam disa gjëra kundër teje: sepse ke aty disa që mbajnë mësimin e Balaamit, i cili e mësoi Balakun t’u vërë një gurë pengese përpara bijve të Izraelit, që të hanë flijime idhujsh dhe të kurvërojnë. ” (Zbulesa 2:14) .

“ Por kam disa gjëra kundër teje, sepse ti e lejon gruan Jezabel, që e quan veten profeteshë, të mësojë dhe t’i mashtrojë shërbëtorët e mi të kurvërojnë dhe të hanë gjëra të flijuara idhujve.”( Zbulesa 2-20)

“ Edhe erdhi një nga të shtatë engjëjt që kishin të shtatë kupat, dhe foli me mua dhe më tha: Eja, do të të tregoj gjyqin e kurvës së madhe që është ulur në ujëra të shumta, me të cilën u kurvëruan mbretërit e dheut, dhe banorët e dheut u dehën me verën e kurvërisë së saj.” (Zbulesa 17:2) .

“ Sepse nga vera e mërisë së kurvërimit të saj kanë pirë të gjitha kombet, dhe mbretërit e dheut me të u kurvëruan, dhe tregtarët e dheut u pasuruan për shkak të luksit të saj të shfrenuar.” (Zbulesa 18: 3, 9).

Pra thamë, se ajo që vihet re sot është se fjala “kurvëri” , iu vret veshin njerëzve, madje kjo ka ndikuar që ndonjëherë t’a heqim nga përkthimi apo leximi i Ungjillit, apo edhe nga predikimi, nga frika se mos njerëzve nuk do iu pëlqejë si fjalë dhe ofendohen .

Por paradoksi është se kjo fjalë iu duket shumë e rëndë dhe nuk iu pëlqen t’a dëgjojnë ata që nuk kanë turp të bëjnë kurvëri, kurorëshkelje madje pa iu fshehur opinionit publik , ashtu si shikohet rëndomtë edhe nëpër Reality Show të ndryshëm në televizion, ose në historitë rozë të postuar edhe mediatikisht.

Kështu, nga ky presion disaherë nxitemi t’a zëvëndësojmë fjalën kurvëri me terma të tjerë si me termin “imoralitet” apo “prostitucion”.

Sqarojmë se fjala "imoralitet", edhe pse mund t’i përshtatet pornias ( kurvërisë ), në vetvete ka një konotacion më të gjerë se fjala specifike “kurvëri”, sepse “Imoralitet” do të thotë mungesë morali në përgjithësi , ose sjellje që bie ndesh me normat etike dhe shoqërore të pranuara. Prandaj imoralitet, apo imoral dhe imorale, vërtetë përdoren për të përshkruar veprime, qëndrime ose mënyra jetese që konsiderohen të gabuara, të turpshme ose të papranueshme nga shoqëria apo nga një sistem vlerash të caktuara morale, por jo patjetër do të thotë një sinonim i fjalës “kurvëri”, si një akt seksual jashtë martese, sepse, fjala "imoralitet" është një koncept subjektiv. Psh ajo që një kulturë apo komunitet e sheh si imorale, një tjetër mund t’a pranojë si normale apo të pranueshme, si në lidhje me abortin , divorcin, nudizmin , drogën .Por edhe vjedhja konsiderohet si akt imoral, apo intriga , opo veprime politike konsiderohen si imorale . P.sh. disa njerëz mendojnë se stili i jetës së lirë është shenjë imoraliteti, ndërsa të tjerë e shohin si liri personale.

Pra “imoralitet” si fjalë është shumë subjektive, ndryshe nga “kurvëria” që është specifike për atë që kryen kurvëri, kurorëshkelje.

Gjatë shekullit IV pas Krishtit , teksti grek i Biblës u përkthye në latinisht nga Shën Jeronimi, ky tekst u quajt “Vulgate”. Në Vulgate, fjala greke “porneia”, është përkthyer në fjalën latine “fornicates” , e njëjtë në kuptim me “porneia” , “kurvëri” në shqip.

Fjala “kurvëri” fornication gjendet në Biblën King James, por përkthimet moderne dhe më të sakta, të tilla si NASB dhe ESV, thjesht zgjedhin t’a përkthejnë atë në “imoralitet”immorality , por ky përkthim në të vërtetë nuk na e jep të saktë konotacionin e fjalës “porneia” ,kurvëri, dhe në një farë mënyre e zbeh si mëkat të vdekshëm .

Edhe fjala “pórne” , që në Dhiatën e Re është përkthyer edhe «prostitucion » dhe shfaqet në 12 vendet vijuese: Mattheu 21:31, 32; Luka 15:30; 1Korintasve 6:15, 16; 31 Hebrenjve 11:31; Jakovit 2:25; Zbulesa 17:1, 5, 15, 16; 19:2; përsëri nuk është e njëjtë me fjalën “ kurvëri” , sepse “prostitucioni” është fjalë që përcakton aktivitetin ku një person ofron shërbime seksuale në këmbim të parave, dhuratave, ose ndihmave materiale.

Prostitucioni mund të shfaqet në shumë forma dhe është i pranishëm në shumicën e shoqërive, me rregullore dhe ligje të ndryshme që e rrethojnë.

Kështu prostitucioni, vërtetë ka marrëdhënie seksuale jashtë martese, por këto marrëdhënie seksuale nuk bëhen vetëm me dëshirë si kurvëria , por ndonjëherë këto marrëdhënie janë të detyruara, pa dëshirë, me përdhunë , një skllave seksi ose nga nevoja ekonomike, si punëtore seksi , prandaj në prostitucion kemi viktima të shumta .

Kjo është arsyeja që Zoti Jisu Krisht edhe pse është kategorikisht kundër prostitucionit, përsëri i shikon me dhëmbshuri dhe i trajton me tolerancë prostitutat, sepse ato jo gjithmonë ishin kurva të rëndomta, por shpesh punëtore , skllave seksi , plotë drama dhe fatkeqësi , prandaj edhe Krishti iu thoshte farisenjve hipokritë :

“ Në të vërtetë po ju them se tagrambledhësit dhe prostitutat hyjnë para jush në Mbretërinë e Qiejve.” ( Mattheut 21:31).

Kjo nuk do të thgotë tolerim për profesionin denigrues dhe çnjerëzor të prostitucionit , por do të thotë se prostituta që detyrohet , do tolerohet më shumë nga Drejtësia Hyjnore, se sa një kurvë që kurvëron nga epshi, pa detyrim, dhe aq më keq nuk pendohet, por justifikohet.

Fjala gjithmonë ka kuptimin dhe ndikimin e saj në psiqikën e atij që ka vesh për të dëgjuar dhe dëgjon , prandaj fjalën duhet t’a përdorim si duhet dhe ku duhet,po ashtu edhe për fjalët kurvëri,imoralitet ,prostitucion.

Por pse ka sot një reaksion kur dëgjohet fjala “kurvëri”?!

Shkaku është vrasja e ndërgjegjes që ndjejnë këta njerëz dhe demaskimin për kurvërinë e tyre para Zotit dhe shoqërisë dhe kjo i bën të reagojnë hipokrizisht si të turpshëm , të fyer , të prekur, sikur kurrë ata nuk kanë bërë asnjëherë mëkatin e kurvërisë , kur e vërteta është krejt ndryshe.

Ky lloj reagimi i këtyre njerëzve është një hipokrizi e pastër por edhe i dëshëm për ata vetë, sepse është i ngjashëm me ata të sëmurë që janë mësuar me sëmundjen dhe nuk duan të shërohen, se kanë frikë jo vetëm nga diagnoza, por edhe nga terapia e dhimbshme e shërimit.

Ata nuk duan të dëgjojnë nga mjeku termin e diagnozës të sëmundjes së tyre vdekjeprurëse, p.sh. nuk duan të dëgjojnë se kanë kancer , kjo i tmeron , prandaj duan të dëgjojnë fjalë më buta se kanë thjesht një hematomë,një gjëndër dhjamore e të tjera si këto, që edhe pse janë të pranueshme për veshin e një pacienti nuk janë të vërteta, dhe si përfundim ky lloj pacienti, nuk vonon shumë dhe vdes nga kanceri, vetëm sepse ai nuk pranoi të dëgjojë se ka kancer ,që të angazhohet me mjekimin për të luftuar sëmundjen.

Këtu nuk është vetëm mëndjelehtësia e pacientit ,por edhe papërgjegjshmëria dhe hipokrizia e mjekut, që për të mos prishur relatat dhe përfitimet nga pacienti, nuk i tregon të vërtetën se ka kancer .

Kështu edhe ata që janë të infektuar dhe të sëmurë me mëkatin e vdekshëm të kurvërisë dhe nuk duan të largohen prej saj, ose nuk janë penduar realisht për kurvërimet që kanë bërë, patjetër që nuk duan t’a dëgjojnë si term fjalën “kurvëri” , por fjala kurvëri edhe pse është e rëndë , kur përdoret saktë dhe me vërtetësi, pa qëllim për të fyer apo denigruar dikë është mëse e domosdoshme , si një bisturi për t’a prerë kancerin moral dhe trupor, siç është edhe kurvëria .

Këtu po flasim për fjalën e Zotit “ Që është e gjallë dhe vepruese. Ajo është më e mprehtë se çdo shpatë me dy tehe dhe depërton deri në ndarjen e frymës së jetës nga shpirti, të kockës nga palca. Ajo shqyrton mendimet dhe qëllimet e zemrës.” ( Hebrenjtë: 4 -12).

Fjala e Zotit gjendet në Shkrimin e Shenjtë, që ne duhet t’a lexojmë ,dëgjojmë për veten dhe t’ia u themi të tjerëve me dashuri, edhe kur bëhet fjalë për kurvëri, jo për fyerje dhe denigrim, por për diagnostikim dhe shërim nga ky mëkat i vdekshëm , ashtu si psh vetë Krishti e tha :

“ Sepse nga zemra dalin mendimet e mbrapshta, vrasjet, shkeljet e kurorës; kurvëria, vjedhjet, dëshmitë e rreme, blasfemitë.” (Mattheu 15:19) .

Dhe apostujt e përforcuan :

“ Largohuni nga kurvëria! Çdo mëkat tjetër që bën njeriu është jashtë trupit, ndërsa ai që kurvëron, mëkaton kundër vetë trupit të tij.” ( 1 Korintasve 6-18).

“Dhe për shkak të kurvërisë, secili të ketë gruan e vet dhe secila grua të ketë burrin e vet!” ( I Korintasve 7: 2-3).

“ Martesa të nderohet nga të gjithë dhe shtrati martesor të jetë i papërlyer, sepse Perëndia do t’i gjykojë kurvarët dhe kurorëshkelësit.” ( Hebrenjtë 13:4).

“ A nuk e dini ju se të padrejtët nuk do të trashëgojnë Mbretërinë e Perëndisë? Mos u gënjeni: as kurvarët, as idhujtarët, as shkelësit e kurorës, as të zhburrëruarit, as homoseksualët nuk do të trashëgojnë Mbretërinë e Perëndisë. (1 Korintasve 6:9).

Dhe Zbulesa e përcakton dënimin përfundimtar , për kurvëruesit e pa penduar , si të gjithë mëkatarët e tjerë : “Kurse për frikacakët dhe të pabesët,të neveritshmit dhe vrasësit, kurvëruesit dhe magjistarët,idhujtarët dhe gjithë gënjeshtarët, pjesa e tyre do të jetë në liqenin që digjet me zjarr dhe squfur, që është vdekja e dytë.” ( Zbulesa 21 -22)

Prandaj nuk është turp dhe skandal të thuash fjalën “kurvëri”siç është edhe në Bibël , por të bësh “kurvëri” dhe mos pendohesh është turp dhe skandal !

DUHET APO JO T’A PËRDORIM FJALËN KURVËRI ?

No comments

Leave a reply