Dashuria e tepruar i bën fëmijët të padobishëm : (Shën Pais Agjioriti - Vitamina shpirtërore)
Kam vënë re se të rinjtë e sotëm, sidomos ata që studiojnë, dëmtohen nga shtëpitë e tyre. Ndërsa janë fëmijë të mirë, bëhen të padobishëm. Nuk mendojnë, kanë një lloj pandjeshmërie. I shkatërrojnë, i prishin vetë prindërit. Meqë prindërit kaluan vite të vështira, duan që fëmijët e tyre të mos privohen nga shumë gjëra. Nuk kultivojnë sedrën tek fëmijët, saqë të gëzohen kur privohen nga diçka. Natyrisht, ata e bëjnë këtë gjë me dëshirën e mirë. Në fakt, që t'i privojnë nga diçka pa e kuptuar këtë gjë fëmijët, është diçka barbare. Por, që t'i ndihmojnë të fitojnë ndërgjegje murgjërore dhe të gëzohen vetë që u privuan nga diçka, kjo është gjë shumë e mirë. Me mirësinë e tyre të pamatur i budallallepsin. I mësojnë t'ua çojnë të gjitha në dorë, madje edhe ujin, që të lexojnë dhe të mos humbasin kohë, kështu që i bëjnë të padobishëm edhe vajzat edhe djemtë. Pastaj fëmijët sido që nuk lexojnë, i duan të gjitha në dorë. Dhe e keqja fillon nga nënat: "Ti, biri im, të lexosh. Unë do të të sjell edhe çorapet, do të të laj edhe këmbët. Merre ëmbëlsirën, merre dhe kafenë"! Dhe nuk e kuptojnë fëmijët se sa e lodhur është nëna që ua jep të gjitha këto, sepse nuk lodhen. Pastaj fillojnë me pjatat e një përdorimi, rrobat që i veshin vetëm një herë, duan pica të hanë, ndërsa nuk dinë as si t'i mbështjellin me letër. Kështu bëhen njerëz të padobishëm. Pastaj përtojnë që të jetojnë. Vetëm lidhësja po t'u zgjidhet thërrasin "mami, m'u zgjidh këpuca"! Madje e shkelin me këmbë. Fëmijë të tillë çfarë prokopie do të bëjnë? Këta nuk bëjnë as për martesë dhe as për jetën murgjërore. Prandaj u them nënave: "Mos i lini fëmijët që të lexojnë gjithë ditën. Lexojnë, lexojnë dhe pastaj trullosen. Të bëjnë një gjysëm, një çerek ore pushim, që të bëjnë edhe ndonjë punë në shtëpi që të gjallërohen".
Ky zakon i keq i fëmijëve të sotëm po futet edhe në jetën murgjërore. Dhe shikoni në manastir shtatë sekretarë, të gjithë të rinj të shkolluar dhe bashkë me ta edhe i vjetri. Qëmoti kishte vetëm një sekretar dhe ai nuk kishte bërë as dy klasë shkollë, por ama punën e bënte. Tani ka shtatë, të zhytur në punë, dhe nuk arrijnë të bëjnë as detyrat e tyre shpirtërore edhe pse ndodhet i vjetri pranë tyre.
Për dashurinë ! (Shkëputur nga libri i Akrimandrit Sofronit "Shën Siluan Athoniti")
Asnjë njeri, nga vetja e tij, nuk mund të njohë se çfarë është dashuria e Perëndisë, nëse nuk është mësuar prej Shpirtit të Shenjtë; por dashuria e Perëndisë është njohur në Kishën tonë me anë të Shpirtit të Shenjtë dhe prandaj ne flasim për këtë dashuri.
Shpirti mëkatar, që nuk e njeh Zotin, i trembet vdekjes, duke menduar se Zoti nuk do t’i falë mëkatet e tij. Por kjo ndodh, ngaqë shpirti nuk e njeh Zotin dhe nuk e di se sa shumë Ai na do. Por, sikur njerëzit ta dinin këtë, atëherë, asnjë njeri nuk do të dëshpërohej, sepse Zoti, jo vetëm që fal, por gëzohet shumë në kthimin e mëkatarit. Edhe sikur të jeni në çastin e vdekjes, beso fort, se në momentin që ti do të kërkosh, do ta marrësh faljen.
Zoti nuk është si ne. Ai është shumë i butë, i mëshirshëm dhe i mirë; dhe kur shpirti e njeh Atë, ai mrekullohet pa masë dhe thërret: “O, çfarë Zoti është Zoti ynë!”
Shpirti i Shenjtë e bëri Kishën tonë ta njohë se sa e madhe është mëshira e Perëndisë. Zoti na do dhe na pranon butë, pa qortim, ashtu si ati në historinë e Ungjillit nuk e qortoi birin e tij plangprishës, por u tha shërbëtorëve të tij që të sillnin një rrobë të re dhe vendosi një unazë të çmuar në gishtin e tij dhe këpucë në këmbët e tij dhe urdhëroi që të therrnin viçin e majmë dhe u gëzua dhe nuk e dënoi në asgjë birin e tij.
O, sa me butësi dhe me durim, duhet edhe ne ta drejtësojmë vëllanë tonë, që të ketë ketë gëzim në shpirt për kthimin e tij!
Shpirti i Shenjtë i mëson shpirtit një dashuri e shpirtmirësi të parrëfyer O vëllezër, le ta harrojmë tokën dhe gjithçka që është në të! Toka na mashtron, duke na larguar prej soditjes së Trinisë së Shenjtë, të Cilën mendja jonë nuk mund ta kuptojë, por, shenjtorët në qiell e vështrojnë Atë në Shpirtin e Shenjtë.
Ne nga ana jonë, duhet të vazhdojmë në lutje pa imagjinime, dhe t’i kërkojmë Zotit një shpirt të përunjur, dhe Zoti do të na dojë dhe do të na japë këtu në tokë të gjitha gjërat e dobishme për shpirtin dhe trupin.
O Zot i mëshirshëm, jep hirin Tënd tek të gjithë popujt e dheut, që ata të arrijnë të të njohin, sepse pa Shpirtin Tënd të Shenjtë njeriu nuk mund të të njohë, dhe të kuptojë dashurinë Tënde. Fëmijë të vegjël, njiheni Krijuesin e qiejve dhe të dheut! O Zot, dërgo mëshirën Tënde te fëmijët e tokës, të cilët Ti i do, dhe bëji ata që të të njohin me anë të Shpirtit të Shenjtë. Me lotë po të lutem, dëgjoje lutjen për fëmijët e Tu, dhe lejo që të gjithë të mund të njohin lavdinë Tënde me anë të Shpirtit të Shenjtë.
Qysh prej djalërisë sime më ka pëlqyer të mendoj: Zoti u ngjit në qiell dhe po pret ardhjen tonë; por që të jemi me Zotin, ne duhet të bëhemi të ngjashëm me Atë, ose të ngjashëm me fëmijët e vegjël - të unjët dhe të butë - dhe ne duhet t’i shërbejmë Atij. Atëherë, sipas fjalëve të Zotit, “Ku jam unë, atje do të jetë edhe shërbëtori im” - ne gjithashtu, do të jemi me Atë në Mbretërinë e Qiejve. Por tani në këtë ditë, shpirti im është i dekurajuar dhe i demoralizuar dhe nuk jam në gjendje ta ngre mendjen të patrazuar lart te Perëndia, dhe nuk kam më lotë, me anë të të cilëve të vajtoj për punët e mia të këqija; shpirti im është tharë dhe rrënuar nga nata e kësaj jete.
O, kush do të ma këndojë mua këngën, të cilën e kam dashur qysh prej fëmijërisë sime - këngën e ngjitjes së Zotit në qiell, të dashurisë së Tij për ne, për vigjilimin e Tij për ardhjen tonë? Këtë këngë do ta dëgjoja me lotë, sepse shpirti im është i lodhur në këtë tokë.
Çfarë më ka ndodhur mua? Si ndodhi që e humba gëzimin dhe a do ta fitoj përsëri atë gëzim?
Vajtoni me mua, të gjitha ju kafshët dhe zogjtë. Vajtoni me mua ti o pyll dhe ti o shkretëtirë. Le të vajtojë me mua, çdo krijesë e krijuar nga Perëndia dhe le të më ngushëllojnë në hidhërimin dhe trishtimin tim.
Në këtë mënyrë mendoj në shpirtin tim: nëse unë që e dua Perëndinë kaq pak, jam kaq shumë i lënduar në zemër, sa shumë i madh duhet të ketë qenë pikëllimi i Nënës së Perëndisë, kur ajo mbeti vetëm në tokë mbas Ngjitjes së Zotit të saj.
Ajo nuk e shkroi historinë e dhembjes së shpirtit të saj dhe ne dimë shumë pak për jetën e saj në tokë, por kaq ne mund ta marrim me mend - që dashuria e madhe e saj, për Birin e saj dhe Perëndinë e saj, shkon përtej kuptimit tonë.
Vazhdon....
Shën Manueli nga Sfakion : 15 Mars
Ky Martiri i Ri lindi në Sfakia të Kretës, prej prindërsh besëmirë. Në moshë të vogël u zu rob prej turqve, dhe u islamizua me dhunë dhe në vazhdim shërbeu si shërbëtor i pengmarrësve të tij. Por gjeti mundësinë dhe u arratis nga shtëpia e zotërinjve të tij dhe shkoi në ishullin Mikonos, ku u rrëfye dhe filloi të bënte një jetë të krishterë.
Aty u martua dhe bëri gjashtë fëmijë. Por pasi bashkëshortja e tij tradhëtoi nderin e saj bashkëshortor, Shenjti bashkë me gjashtë fëmijët lëvizën në një shtëpi tjetër. Por vëllai i bashkëshortes së tij të pabesë, i cili shërbente në flotën turke, e akuzoi Manuelin tek kapedani turk se, ndërsa Manueli ishte bërë mysliman ishte rikthyer në fenë e krishterë.
Kur u arrestua nga kapedani turk, Manueli me guxim pohoi besimin e tij tek Krishti. Pas shumë torturash i’u dha admiralit Kuxhuk që gjendej në ishullin Kios. Ai e gjykoi dhe e dënoi me vdekje. Kështu që shërbyesit e admiralit e morën Manuelin dhe e sollën në vendin e ekzekutimit, që quhej Palia Vrisi. Dhe ndërsa martiri përkuli qafën, xhelati, që kishte marrë urdhër për ta vrarë, u frikësua, hodhi tej shpatën dhe u largua. Atëherë shpatën e mori një nënoficer, i cili pasi nuk mundi që ta priste kokën e shenjtit, edhe pse e goditi shumë herë, e hodhi në tokë dhe e theri në mënyrën më të tmerrëshme sikur të ishte një dele.
Të gjitha këto u bënë në Kios, më 15 mars 1792, ditën e hënë, në orën 4 pasdite. Lipsanin e nderuar të shenjtit, turqit e hodhën në det. Një dëshmi e këtij martiri në dorëshkrim gjendet në bibliotekën e Manastirit të Ksenofondës në Malin e Shenjtë.